Бидний тухай

Вэлүү Сан нь 2007 онд хөгжиж буй орны өнчин, эмзэг бүлгийн хүүхдүүдэд тусламж үзүүлэх зорилготойгоор Канад улсад үүсгэн байгуулагдсан ба Малайз, Энэтхэг зэрэг орнуудад боловсрол, эрүүл мэндийн чиглэлийн төсөл хөтөлбөрүүдийг дэмжиж зохион байгуулсаар ирсэн билээ. Улмаар Монголд 2011 оноос эхлэн нийгэмд чиглэсэн хэд хэдэн хөтөлбөрүүдийг Улаанбаатар, Эрдэнэт, Дархан хотуудад хэрэгжүүлсэн ба манай хамгийн гол төсөл болох “Нарны Хүүхдүүд” хүүхдийн цэцэрлэг маань 2013 оны 9-р сард байгууллагдсанаар бид тогтвортой үйл ажиллагаагаа эрхэлж байна. Анх цэцэрлэг маань хогийн цэг түшин амьдардаг ба нэн ядуу бүлгийн 30 хүүхэдтэйгээр эхэлж байсан бол одоо “Нарны Хүүхдүүд” 1 ба 2-дугаар цэцэрлэгээрээ дамжуулан 300 гаруй хүүхдийг хооллож ундлах байртай, сурган хүмүүжүүлэх ажилтан багш нартай болж үйл ажиллагаа маань өргөжин тэлсээр байна. Мөн бид Gandys Kids Campus олон нийтийн номын сан, “Дүүлэх Тогоруу” хүүхдийн зуслан, орон нутгийн эмэгтэйчүүдийг сургаж, ажлын байраар хангах “Тусчхан” оёдлын цех, амьдралын боломж тааруу хүүхдүүдийг хувийн сургуульд сургах тэтгэлэгт хөтөлбөр гэх мэт төслүүдийг хэрэгжүүлж байна.

Вэлүү сан нь хандивын үйл ажиллагаанаас олсон орлогоор төсөл хөтөлбөрийнхөө санхүүжилтийг босгодог бөгөөд энэхүү арга хэмжээнүүд дунд Морин аялал, Гала арга хэмжээ мөн энд зарагдаж буй бүтээгдэхүүнүүд орно.